वॉशिंग्टन : अमेरिकेचे बायडन प्रशासन पुढच्या आठवड्यात एक गुप्तचर अहवाल जाहीर करणार आहे ज्यामुळे सौदी अरेबियाबरोबरचा तणाव आणखी तीव्र होण्याची शक्यता आहे. अमेरिकन माध्यमांतील वृत्तानुसार या गुप्तचर अहवालात असे आढळले आहे की, सौदी अरेबियाचा राजकुमार मोहम्मद बिन सलमान याने सन 2018 मध्ये पत्रकार जमाल खाशोगी यांच्या हत्येचे आदेश दिले होते.वॉशिंग्टन पोस्टच्या वृत्तानुसार, राष्ट्रीय बुद्धिमत्ता संचालक कार्यालयाने हा अहवाल तयार केला असून पुढील आठवड्यात तो सार्वजनिक केला जाईल. खाशोगी वॉशिंग्टन पोस्टमध्ये सौदी अरेबिया सरकारवर टीका करणारा मजकूर लिहायचे. 

ते तुर्कीच्या महिलेशी लग्न करण्यासाठी आवश्यक असलेली कागदपत्रे मिळवण्यास इस्तंबूलस्थित सौदी वाणिज्य दूतावासात गेले तेव्हा त्यांना ड्रग्ज देऊन मारण्यात आले होते. वॉशिंग्टन पोस्टच्या वृत्तानुसार, राष्ट्रपती जो बायडन हे मोहम्मद बिन सलमानशी नाही, तर त्यांचे वडील बिन अब्दुलाझीझ यांच्याशी चर्चा करणार आहेत. तर, संरक्षणमंत्री लॉयड ऑस्टिन हे प्रिन्स मोहम्मद बिन सलमानशी चर्चा करतील. विशेष म्हणजे,सौदी अरेबियात क्राउन प्रिन्स हाच देशाचा शासक मानला जातो.

दरम्यान, जमाल खाशोगी यांच्या हत्येचे अनेक पुरावे आपल्याला मिळाले असल्याचा दावा तुर्कस्तानकडून करण्यात आला होता. यापूर्वी अमेरिकेने येमेनमधील होथी बंडखोरांना दिलेला दहशतवाद्यांचा दर्जा मागे घेण्याची व सौदीचे समर्थन थांबवण्याची घोषणा केली होती. हा मानवी आणि सामरिक नाश रोखण्यासाठी येमेनमधील युद्ध संपवण्याच्या दृष्टीने मुत्सद्दीपणाने विस्तार केला जात असल्याचे बायडन यांनी म्हटले होते. सन 2019 मध्ये अमेरिकन कॉंग्रेसने खाशोगी हत्येतील सौदी अधिकाऱ्यांच्या भूमिकेबद्दल चौकशी अहवाल सादर करण्यास सांगणारा कायदा संमत केला होता.