Navelim Road divider : बेले-नावेली येथील धोकादायक रस्ता विभाजक हटवा : तुयेकर

Navelim Road divider : मडगाव, नावेलीचे आमदार व कदंब महामंडळाचे चेअरमन उल्हास तुयेकर यांनी मंगळवारी (ता.९) बेले-नावेली येथील धोकादायक रस्ता विभाजकाची पाहणी करून अपघातास कारणीभूत ठरणारा हा रस्ता विभाजक हटविण्याची सूचना केली.

तुयेकर यांनी मंगळवारी सकाळी बेले-नावेली येथे भेट देऊन तेथील धोकादायक रस्ता विभाजकाची पाहणी केली.

यावेळी नावेलीचे पंच दामोदर चव्हाण व मायकल कार्दोझ, राष्ट्रीय महामार्ग विभागाचे साहाय्यक अभियंता अजय गावडे, वाहतूक पोलिस अधिकारी व स्थानिक ग्रामस्थ हरीश तुळसकर उपस्थित होते.

रस्ता रुंदीकरणासाठी जमीनमालकाने जागा न दिल्याने बेले-नावेली येथील महामार्गाचा छोटासा पट्टा अरुंद राहिला आहे. या ठिकाणी वाहनांची रस्ता विभाजकाला धडक बसून अपघात घडत आहेत. सोमवारीही या रस्ता विभाजकाला एका कारची धडक बसली.

सुदैवाने कारमधील प्रवासी सुखरूप बचावले. या अपघातात रस्ता विभाजक मात्र उखडला आहे. सर्रास अपघात घडत असल्याने हा धोकादायक रस्ता विभाजक हटविण्यात यावा, अशी स्थानिकांची मागणी आहे.