दाबोळी-नवेवाडे हाउसिंग बोर्ड वसाहतीतील ५४५ घरे गोवा गृहनिर्माण महामंडळ 'नियमित' करणार असल्याचे पंचायत मंत्री माविन गुदिन्हो यांनी सांगितले. ४० वर्षे जुनी ही घरे असून येथील रहिवाशांनी आपली घरे कायदेशीर करण्यासाठी अनेकदा प्रयत्न केले होते. परंतु काही तांत्रिक कारणांमुळे ही घरे 'नियमित' होण्यास अडचणी येत होत्या. पण आता लवकरच गोवा गृहनिर्माण महामंडळामार्फत येथील ५४५ घरे 'नियमित' करण्यात येतील, असे मंत्री गुदिन्हो यांनी सांगितले.
गृहनिर्माण महामंडळाचे अध्यक्ष जीत आरोलकर व महामंडळाच्या पदाधिकाऱ्यांसमवेत मंत्री गुदिन्हो यांनी नवेवाडे हाउसिंगबोर्ड वसाहतीत शुक्रवार दौरा केला. यावेळी मंत्री गुदिन्हो यांनी सांगितले की, गेली ४० वर्षे येथील घरमालक आपली घरे 'नियमित' करण्यासाठी विविध सरकारी कार्यालयात जाऊन प्रयत्न करत होते. परंतु काही तांत्रिक कारणांमुळे घरे कायदेशीर होण्यास अडचण येत होती. आता या अडचणी दूर झाल्या असून या घरमालकांना लवकरच न्याय मिळणार आहे, असे गुदिन्हो यांनी यावेळी सांगितले.
गोवा गृहनिर्माण महामंडळाचे अध्यक्ष जीत आरोलकर यांनी सांगितले की, प्रत्येकाला घर देण्यासाठी राज्य सरकार प्रयत्न करत आहे. यासाठी गृहनिर्माण महामंडळ आपल्या परीने पुढाकार घेत आहे. दाबोळी-नवेवाडे येथील हाउसिंग बोर्ड वसाहतीतील अंदाजे ५४५ घरांना नियमित करण्यासाठी गेल्या अनेक वर्षांपासून सरकारी पातळीवर विविध मार्गे प्रयत्न सुरू होते. या प्रयत्नांना यश आले असून येत्या काही दिवसांत येथील ५४५ घरे ''नियमित '' करण्यात येणार आहेत. लवकरच गोवा गृहनिर्माण महामंडळाच्या सर्व सदस्य व प्रशासकीय अधिकाऱ्यांच्या बैठकीत ही घरे ''नियमित '' करण्यासाठी पुढाकार घेतला जाईल, असे त्यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.