Private Bus Ticket : खासगी बस तिकीट दरावर नियंत्रण आणा! सुराज्य अभियान

Private Bus Ticket :

पणजी, उन्हाळ्याच्या सुट्टीत खासगी प्रवासी वाहतूक करणाऱ्या बसेसच्या तिकीट दरावर नियंत्रण आणा, अशी मागणी हिंदु जनजागृती समितीची शाखा ‘सुराज्य अभियान’ या संस्थेने गोव्याच्या वाहतूक खात्याकडे केली आहे.

यासंबंधीचे निवेदन वाहतूक खात्याचे उपसंचालक बी.ए. सावंत यांना देण्यात आले. हे निवेदन देताना ‘सुराज्य अभियान’च्या शिष्टमंडळामध्ये सुशांत दळवी, मिहीर दळवी आणि दिलीप शेट्ये यांचा समावेश होता.

शाळांना उन्हाळ्याची सुट्टी पडल्यानंतर मागणी वाढल्याने प्रवासी वाहतूक करणाऱ्या खासगी बसेसच्या तिकिटांचे दर नियमित दरापेक्षा दुप्पट किंवा त्याहून अधिक वाढविले जातात. त्यामुळे प्रवाशांना आर्थिक भुर्दंड बसतो.

महाराष्ट्र राज्यात प्रवासी वाहतूक करणाऱ्या बसेसच्या तिकीट दरावर नियंत्रण आणण्यासाठी महाराष्ट्र शासनाने ‘जी.आर्.’ काढला आहे. त्यानुसार खासगी बसचालकांना राज्य शासनाच्या बसच्या तिकीट दरापेक्षा अधिकाधिक दीडपट दर आकारता येतो. अशाच प्रकारे गोवा सरकारनेही खासगी बसेसच्या तिकीट दरावर नियंत्रण आणणारा आदेश तातडीने जारी करावा.