कंटेनर ट्रकान एका ज्येष्ट नागरीकाक दिलो धपको
बुधवारां सांजे वेळार चिंबलां राष्ट्रीय म्हामार्गाच्या जंक्शनाचेर कंटेनर ट्रकान एका ज्येष्ट नागरीकाक धपको दिलो. ह्या अपघातांत त्या जाण्ट्याक आकताक मरण आयलें. मेळिल्ल्या म्हायती प्रमाण कंटेनर ट्रक फोंड्या वयतालो. तेन्ना रस्तो हुपताना जंक्शनाचेर जाणट्याक ट्रकान धपको दिलो. ह्या अपघाता संबंदी पोरने गोंय पुलिसांनी ट्रक चलोवप्याक अटक केल्या. ह्या भिरांकूळ अपघाता उपरांत चिंबलांच्या थळाव्यांनी अपघाताच्या सुवातेर आंदोलन केले ताका लागुन थंयचें वातावरण तापलें. येरादारी सुमार 3 वारां आडकून उरली. प्रस्न सुटावो करपाक थळावो आमदार रुदोल्फ फार्नाडिस, भौशीक बांदकाम खात्याचो अभियंतो तशेंच मामलेदार पावलो. ह्या जंक्शनाचेर स्पीड ब्रेकर घालीना जाल्यार मरण आयिल्ल्या जाणट्याची कूड मामलेदार कार्यालयात व्हरतलें अशीं शिटकावणी थळाव्या लोकांनी भौशीक बांदकाम खात्याच्या अधिकाऱ्यांक दिली. उपरांत बिरेस्तार दिस सकाळी त्या जंक्शनाचेर स्पीड ब्रेकर घालून दितले अशें आस्वासन भौशीक बांधकाम खात्याच्या अधिकऱ्यान दिलें.
आदिवासी लोकांक रान हक्क कायद्या खाला जमनीचें दाखले दितलें : मुख्यमंत्री
आदिवासी समाजाच्या लोकांक रान हक्क कायद्या खाला जमनीचें रहिवासी दाखले दितलें अशें मुख्यमंत्री दोतोर प्रमोद सावंत हांणी जाहिर केला. फुडल्या एका वर्सांत देड हजार सनदी दितलें अशेंय ताणें सांगलें. आदिवासी कल्याण खातें तशेंच उटा हे संघटणे वतीन शहीद मंगेश गांवकार आनी दिलीप वेळीप हांचे यादी निमतान केल्ल्या प्रेरणा दीस कार्यावळींत ते उलयतालें. ह्या वेळार माचीयेर उटा संघटणेचे अध्यक्ष प्रकाश वेळीप, आमदार गणेश गांवकार, आमदार आंतोनियो वाझ, खात्याचे संचालक रवी धवन, खात्याच्यो संचालिका त्रिवेणी वेळीप तशेंच ह्या समाजाचे हेर फुडारी हाजीर आशिल्ले. आदिवासी समाजा खातीर खात्यावतीन सांग्यार नवे आदिवासी संशोधन केंद्र उबारतात. तशेंच फर्मागुडीयेर आदिवासी संग्रहालय आनी रोखडेंच आदिवासी भवनूय बांदतले.
बिबट्याक रान अधिकाऱ्यांनी सुरक्षितपणान भायर काडलो
बुधवारा रातीकडेन वेळ्ळी वाठारांत बांयंत पडिल्ल्या बिबट्याक रान अधिकाऱ्यांनी सुरक्षितपणान भायर काडलो. मेळिल्लया म्हायती प्रमाण रातच्या 9 वरांचेर वेळ्ळी वाठारांत बिबटो बांयत पडलो. थळाव्या लोकांनी ताची म्हायती रान अधिकाऱ्यांक दिली आनी तें घडणूके थळार पावलें. सुमार अडेच वरां बिबटो बांयत उरलो ताच्या उपरांत रान अधिकाऱ्यांनी ताका सुरक्षित पणान बांयतल्यान भायर काडलो आनी मध्यानराती सुमार दोन वरांचेर जंगलात सोडलो.
शॅकाक उजो लागून सुमार सात लाख रुपयांचे लुकसाण
जूनस-वाडो मांद्र्या एका शॅकाक उजो लागून सुमार सात लाख रुपयांचे लुकसाण जालें. हो शॅक लक्ष्मीकांत नायक आनी सदगुरु नायक ह्या दोग भावांचो. घडणुकेची म्हायती मेळटकीर उजो पालोवपी दळान घडणूक थळार धाव मारून उजो पालोवपाचो यत्न केलो. ह्या उज्यांत फ्रिज, गॅस शेगड्यो, सिलेंडर, फर्निचर, रांदपाची आयदनां, टेबल, कदेली आनी हेर वस्तूंचो लासून गोबर जालो. उजो लागपाचे नेमके कारण कळपाक शकलें ना.
खासा बायलां खातीर पणजी तें फोंडा बस सेवा
कदंब म्हामंडळ येता त्या 30 तारके सावन परत एक फावट खासा बायलां खातीर पणजी तें फोंडा बस सेवा सुरू करतलें. कोरोना म्हामारीच्या काळांत हीं सेवा बंद आशिल्ली आता तीं कदंबा सेवा परत सुरू करपाचें थारायला. कदंबाच्यो पणजी तें मडगांव , पणजी तें कळंगुट , पणजी तें वास्को अश्यो बायलां खातीर कदंबा सेवा पांच वर्सां पयली चालू आशिल्ल्यो. आता हेर वाठारांत लेगित ह्यो कदंबा सेवा उपल्बद करतलें अशीं म्हायती म्हामंडळाच्या वेवस्थापनान दिल्या. गेलीं कितलीशींच वर्सा जाली बेगर गोमंतकीय लोकांचो आंकडो वाडिल्यान कामगारांची बसीत प्रचंड गर्दी वाडटा. ह्या गर्देंत बायलांक आनी विद्यार्थांक त्रास सोसचो पडटा . बसींत बसपाक लेगीत सीट मेळना. ह्याच मुख्य उद्देशान कदंब म्हामडळान हीं सेवा परत सुरू करपाचो निर्णय घेतला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.