Bicholim News: मांडवी नदीतून बेकायदा वाळू चोरी करणाऱ्याला अटक; 14 हजाराची वाळू जप्त

Bicholim Police News: मांडवी नदीतून बेकायदेशीररित्या वाळू उपसा करून वाळूची चोरी केल्याप्रकरणी डिचोली पोलिसांनी एका ट्रकचालकास अटक केली आहे. राजेश किनाप्पा चव्हाण (वय 45) असे त्याचे नाव आहे. तो मूळचा तिस्क, सावर्डे, सांगे येथील रहिवासी आहे.

त्याच्याकडून 14 हजारांची वाळू जप्त करण्यात आली आहे. तसेच टिप्पर ट्रक GA 09 T 6265 देखील पोलिसांनी ताब्यात घेतली आहे. त्याच्यासोबत आणखी दोघांविरोधात डिचोली पोलिसांत गुन्हा दाखल करण्यात आला आहे. त्यापैकी एक जण ट्रकमालक आहे.

आनंद मंगेश दळवी असे त्याचे नाव आहे. तो बागवाडा, सावर्डे, सांगे येथील रहिवासी आहे. तर बेकायदा वाळू उपसा करणाऱ्या सुशांत नाईक याच्यावरही गुन्हा दाखल करण्यात आला आहे. तो बेतकी येथील रहिवासी आहे.

माईन्स अँड मिनरल्स डेव्हलपमेंट अँड रेग्युलेशन अॅक्ट 1957 या कायद्यानुसार त्यांच्यावर गुन्हा दाखल करण्यात आला आहे. पोलिस उपनिरीक्षक विकेश हडफडीकर यांच्या तक्रारीवरून हा गुन्हा दाखल केला गेला.

कोणत्याही अधिकृत परवाना, परवानगीशिवाय हा वाळू उपसा केला जात होता. ही वाळू परस्पर विविध ठिकाणी पोहचवली जात होती. या वाळूची चोरटी वाहतूक केली जात होती. या प्रकरणाचा पुढील तपास एएसआय शिवा नाईक करत आहेत.