सासष्टी, मडगावातील आबाद फारिया हा एक प्रमुख रस्ता. या रस्त्यावर सतत वाहनांची वर्दळ असते.
आज संध्याकाळी सव्वापाचच्या सुमारास एक मोठा वृक्ष या रस्त्यावर उन्मळून पडला. त्यामुळे जवळजवळ चार तास वाहतूक बंद करण्यात आली. मात्र सुदैवाने आणि श्री दामबाबाच्या कृपेने प्राणहानी टळली.
काही दिवसांपूर्वी याच वृक्षांच्या मोठ्या फांद्या उन्मळून पडल्या होत्या. तरीही वृक्षमालकाने तो वृक्ष कापण्याची तसदी घेतली नाही, असे शेजाऱ्यांनी सांगितले.
पोलिस व अग्निशमन दलाच्या जवानांनी लगेच घटनास्थळी धाव घेऊन वृक्ष हटविण्याचे काम केले. माहिती मिळताच आम्ही लगेच घटनास्थळी पोहोचलो आणि झाड कापून रस्ता वाहतुकीसाठी रस्ता मोकळा केला, असे अग्निशमन दलाचे प्रमुख गीर सौदा यांनी सांगितले.
सदर भलामोठा वृक्ष उन्मळून पडताना तेथून एक होंडा गाडी जात होती. या गाडीत एक दाम्‍पत्‍य व त्याचा लहान मुलगा मागे बसला होता. वाहनांची मागील काच फुटली, मात्र तिघेही थोडक्यात बचावले. हे एक वाहन सोडले तर तेव्हा रस्ता मोकळाच होता. वृक्ष खाली कोसळला तेव्हा समोरच्या घरातील वडीलधारी माणसे बाहेर होती. घराची कौले फुटली, पण त्यांना इजा झाली नाही. दामबाबानेच वाचवले, अशीच सर्वांची भावना होती.
या मुख्य रस्त्यावर आणखी अनेक धोकादायक झाडे आहेत, जी ताबडतोब कापणे आवश्यक आहे. मडगाव नगरपालिकेच्या अधिकाऱ्यांना याची दखल घेतली पाहिजे. तसेच आता जो वृक्ष कोसळला आहे, तो तेथून लगेच हटवावा.
- सगुण नायक, स्थानिक नगरसेवक
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.