Women's T20 World Cup: महिला टी20 वर्ल्डकप 2023 स्पर्धेत भारतीय महिला संघाने रविवारी पाकिस्तान महिला क्रिकेट संघाला 7 विकेट्सने पराभूत केले. हा भारतीय संघाचा या स्पर्धेतील पहिला सामना होता. त्यामुळे भारतीय संघाने आपल्या वर्ल्डकप मोहिमेची विजयाने सुरुवात केली आहे.

भारताच्या विजयात मधल्या फळीतील फलंदाज जेमिमाह रोड्रिग्ज आणि यष्टीरक्षक ऋचा घोषने महत्त्वाची कामगिरी बजावली. पाकिस्तानने दिलेल्या 150 धावांच्या आव्हानाचा पाठलाग करताना या दोघींनी चौथ्या विकेटसाठी नाबाद 58 धावांची भागीदारी केली.

भारताने 14 व्या षटकात 93 धावांवर 3 विकेट्स गमावल्या होत्या. पण त्यानंतर जेमिमाह आणि ऋचा यांनी पाकिस्तानला यश मिळू दिले नाही. या दोघींनीही एकमेकींना चांगली साथ दिली. या दोघींनी मिळून 17, 18 आणि 19 या तीन षटकात मिळून 42 धावा काढल्या.

या तीन षटकात जेमिमाह आणि ऋचा या दोघींनीही प्रत्येकी 4 षटकार ठोकले. त्यांच्या या फटकेबाजीमुळे भारताने एक षटक आणि 7 विकेट्स राखून विजय मिळवला.

जेमिमाहने या सामन्यात 38 चेंडूत 53 धावांची नाबाद खेळी केली. या खेळीत जेमिमाहने 8 चौकार मारले. तसेच ऋचाने 20 चेंडूत 31 धावांची नाबाद खेळी करताना 5 चौकार ठोकले. या दोघींच्या फटकेबाजीचा व्हिडिओ आयसीसीने सोशल मीडियावर शेअर केला आहे.

भारताकडून जेमिमाह आणि ऋचा व्यतिरिक्त शफाली वर्माने 25 चेंडूत 33 धावांची खेळी केली. तसेच यास्तिका भाटियाने 17 आणि हरमनप्रीत कौरने 16 धावांची खेळी केली.

दरम्यान, पाकिस्तानने या सामन्यात प्रथम फलंदाजी करताना 20 षटकात 4 बाद 149 धावा केल्या होत्या. पाकिस्तानकडून कर्णधार बिस्माह मारुफने सर्वाधिक नाबाद 68 धावांची खेळी केली.

तसेच तिला 18 वर्षीय आयेशा नसिमने चांगली साथ देताना नाबाद 43 धावा केल्या. या दोघींमध्ये ५ व्या विकेटसाठी नाबाद 81 धावांची भागीदारी झाली. भारताकडून राधा यादवने 2 विकेट्स घेतल्या. तसेच दीप्ती शर्मा आणि पूजा वस्त्राकरने प्रत्येकी 1 विकेट घेतली.