फोंडा येथील ज्येष्ठ रंगकर्मी तथा उद्योजक जगदीश जयराम शेट वेरेकर (८०) यांचे गुरुवारी अल्प आजाराने निधन झाले. त्यांच्या पश्चात भाऊ, बहीण, दोन मुलगे, मुलगी, सुना, जावई, नातवंडे असा मोठा परिवार आहे.

वेरेकर यांनी जवळजवळ पन्नास वर्षे मराठी तथा कोकणी रंगभूमी गाजवली. अनके मराठी तसेच कोकणी नाटकातील त्यांच्या भूमिका प्रेक्षकप्रिय ठरल्या होत्या. सिने क्षेत्रातही त्यांनी आपला दबदबा निर्माण केला होता. त्यांच्या निधनाची बातमी कळताच अंत्रुज महालातील अनेक कलाकारांनी त्यांच्या पार्थिवाचे दर्शन घेतले. नाट्य क्षेत्रात पोकळी झाल्याची भावना कलाकारांनी व्यक्त केली.

अष्टपैलू कलाकार: म्हाडगुत

जगदीश वेरेकर हे एक अष्टपैलू कलाकार होते. नाट्यशेत्र बरोबर त्यांनी सिने क्षेत्रही गाजविले होते. माझ्या चार चित्रपटात त्यांनी भूमिका केल्या होत्या. जीव ओतून काम करणे, त्याचबरोबर दिलेली भूमिका दिग्दर्शकाच्या सूचनेप्रमाणे वठवणे या त्यांच्या गुणामुळेच ते लोकप्रिय होऊ शकले. या महान कलाकाराच्या जाण्यामुळे एक पोकळी तयार झाली आहे, अशा शब्दात सिनेनिर्माते दिग्दर्शक तथा लेखक मिलिंद म्हाडगुत यांनी आदरांजली अर्पण केली.