सासष्टी: मडगावच्या रवींद्र भवनात आजपासून सुरू झालेल्‍या अखिल भारतीय कोकणी परिषदेच्या अधिवेशनाला सुरवात झाली खरी, मात्र ग्लोबल कोकणी फोरमतर्फे रवींद्र भवनाबाहेर रोमी कोकणीला राजभाषा दर्जा देण्याची व रोमी कोकणी शालेय अभ्यासक्रमात समाविष्ट करण्‍याची मागणी करून मूक मोर्चा काढला. मात्र या मोर्चाला अल्प प्रतिसाद लाभला.

रवींद्र भवनात अखिल भारतीय कोकणी परिषदेच्या अधिवेशनाला सुरवात झाली. तद्‌नंतर मडगावच्या लोहिया मैदानावर आयोजित खुल्या सत्रालाही अल्‍प प्रतिसाद मिळाला. विशेष म्‍हणजे दोन्‍ही ठिकाणी १०० लोकसुद्धा उपस्‍थित नव्‍हते.

या अधिवशानाला आमचा विरोध असल्याचे फोरमचे अध्यक्ष कॅनेडी आफोन्‍सो यांनी सांगितले. ते म्हणाले की, कोकणी साहित्य परिषदेने साहित्य अकादमीची दिशाभूल केली असल्याने इतर लिपींना त्याचा परिणाम भोगावा लागत आहे. गोव्यात ३३ टक्के ख्रिश्‍‍चन समाज रोमी लिपिचा वापर करत आहे. त्यांच्या भावना व आकांक्षांचा आदर झाला पाहिजे.