फर्मागुढी-फोंड्यातील किल्ल्यावर छत्रपती शिवरायांच्या राज्याभिषेक सोहळ्याच्या स्मृती जागवण्यात आल्या. मंगळवारी शिवराज्याभिषेकदिनानििमत्त आयोजित कार्यक्रमाला फोंडा, मडकई व प्रियोळ अशा तिन्ही मतदारसंघातील मंत्री तसेच जिल्हा पंचायत सदस्य, पंचायत सदस्य, सरकारी अधिकारी आणि शिवप्रेमी मोठ्या संख्येने उपस्थित होते. मान्यवरांनी यावेळी शिवाजी महाराजांच्या पुतळ्याला पुष्पहार अर्पण केले.

फर्मागुढी येथे सकाळी कृषिमंत्री रवी नाईक, वीजमंत्री सुदिन ढवळीकर व कला संस्कृतीमंत्री गोविंद गावडे तसेच जिल्हा पंचायत सदस्य गणपत नाईक, बांदोडा सरपंच सुखानंद कुर्पासकर इतर पंचायतींचे सरपंच, उपसरपंच, पंचसदस्य व शिवप्रेमींनी उपस्थिती लावून शिवाजी महाराजांना पुष्पांजली अर्पण केली. यावेळी फोंड्याचे उपजिल्हाधिकारी रघुराज फळदेसाई, मामलेदार आणि इतर कर्मचारी उपस्थित होते.

शिवरायांचा आदर्श ठेवा

छत्रपती शिवाजी महाराज हे दूरदृष्टी बाळगणारे नेते होते, म्हणूनच त्यांनी स्वराज्याची स्थापना केली आणि रयतेला सुराज्य प्रदान केले. शिवाजी महाराजांचे नियोजन आणि आयोजन नेटके होते, त्यामुळेच तर मुघलांना पळता भुई थोडी झाली. शिवरायांचा हा आदर्श आजच्या युवा पिढीने बाळगायला हवा, असे कृषिमंत्री रवी नाईक यांनी सांगितले.

संघटितपणे कार्य करायला हवे

छत्रपती शिवाजी महाराज यांनी आदर्श राज्य निर्माण करून इतरांसाठी एक उदाहरण ठेवले. रयतेला सुराज्य प्रदान करताना स्वत्वाची जाणीव त्यांनी त्याकाळी मावळ्यात निर्माण केली, म्हणूनच तर स्वराज्याची निर्मिती झाली.

आजच्या काळात सुराज्य निर्माण करण्यासाठी सर्वांनी संघटितपणे कार्य करायला हवे, असे मत वीजमंत्री ढवळीकर यांनी व्यक्त केले.

छत्रपती शिवाजी महाराज आदर्श नेते

छत्रपती शिवाजी महाराज हे आदर्श नेते होते. स्वराज्य निर्माण करताना त्यांनी सर्वांना सोबत घेऊन कार्य केले. सुराज्याची संकल्पना दृढ करण्यासाठी मावळ्यांची साथ घेऊन महाराजांनी मुघलांशी टक्कर दिली.

प्रत्येक घरात शिवाजी निर्माण होण्याबरोबरच माता जिजाऊही तयार व्हायला हव्यात तरच आज सुराज्याची निर्मिती करणे शक्य होईल, अशी माहिती गोविंद गावडे यांनी दिली.