नुपूर शर्माने पैगंबर मुहम्मद यांच्यावर केलेल्या वक्तव्याच्या निषेधार्थ शुक्रवारी रांचीमध्ये गोंधळ झाला. मुस्लिम समाजाने दुकाने बंद ठेवून केलेल्या निदर्शनाला दुपारी हिंसक वळण लागले. मुख्य रस्त्यावर ठिकठिकाणी करण्यात आलेले बॅरिकेडिंग लोकांनी तोडले. पोलिस प्रशासनाने त्यांना रोखण्याचा प्रयत्न केला असता आंदोलकांनी पोलिसांवर दगडफेक सुरु केली.

दरम्यान, जमाव हिंसक होत असल्याचे पाहून पोलिसांना 10 राऊंड हवेत गोळीबार करावा लागला. पोलिस (Police) -आंदोलकांमध्ये झालेल्या चकमकीत अनेक पोलिस जखमी झाल्याचे वृत्त आहे. आंदोलकांनी मुख्य रस्त्यावर उपद्रव सुरुच ठेवल्याचे सांगण्यात येत आहे. रांचीच्या मुख्य रस्त्यावर तोडफोड करण्यात आली. हनुमान मंदिराभोवतीही जोरदार निदर्शने करण्यात आली. मुख्य रस्त्यावरील रतन टॉकीज गल्लीत आंदोलनाचा फायदा घेण्यासाठी अनेक चोरटे जमले आहेत.

दुसरीकडे, प्रयागराजमध्ये डीएम संजय कुमार खत्री आणि एसएसपी अजय कुमार हे देखील शुक्रवारच्या नमाजपूर्वी जामा मशिदीबाहेर पोहोचले आणि लोकांना शांततेचे आवाहन केले. शुक्रवारच्या नमाजानंतर अटाळा चौक आणि आजूबाजूच्या रस्त्यावर उपस्थित अल्पवयीन मुलांनी गोंधळ घालण्यास सुरुवात केली. रस्त्यावरील मुलांनी पोलिसांच्या पथकावर दगडफेकही केली. यामध्ये अर्धा डझनहून अधिक पोलीस कर्मचारी जखमी झाले.