Karmal Ghat : करमलघाट रुंदीकरण कामात अडथळा; नागरिक मात्र संतप्त

Karmal Ghat : काही दिवसांपूर्वी करमलघाटातील वळणावर जिथे अपघाताची घटना घडली होती. त्या रस्त्याचे रुंदीकरण करण्याच्या कामास वनखात्याच्या अधिकाऱ्याने आक्षेप नोंदवला आहे. वनखात्यातर्फे ना हरकत दाखला दिला नसल्याचे सांगून त्यांनी हे काम रोखले. त्यामुळे नागरिकांनी तीव्र संताप व्यक्त केला आहे.

सार्वजनिक बांधकाम खात्याने निविदा काढून रस्ता रूंदीकरणाचे काम कंत्राटदार सी.ए महमद यांना दिले होते. आज कंत्राटदार जेसीबी तसेच सर्व साहित्य व कामगारांना घेऊन या धोकादायक वळणाच्या रूंदीकरणाचे काम करण्यास आला असता वनखात्याच्या अधिकाऱ्यानी त्यांना आडकाठी आणली.

या संदर्भात कंत्राटदार महमद यांच्याशी संपर्क साधला असता सार्वजनिक बांधकाम खात्याने वनखात्याची परवानगी घेतली नसल्याने कामास सुरुवात केली असता ते बांधकाम साहित्य जप्त करण्याची शक्यता होती, त्यामुळे आपण सर्व साहित्य तेथून हलविल्याचे ते म्हणाले.

यासंदर्भात माजी आमदार विजय पै खोत म्हणाले, राष्ट्रीय महामार्ग विभागाचे सहाय्यक अभियंते सागर शेट यांना संपर्क करून पुढील उपाय योजना करण्याकरता उद्या (ता.२२) सकाळी ९.३० वाजता चर्चा करण्यात येणार आहे.

...तर अपघात वाढतील

माजी नगराध्यक्ष दिलीप केंकरे म्हणाले, की नुकताच झालेल्या अपघातात वरुण गांधी या युवकाच्या मृत्यू झाला होता. या मृत्यूस काही प्रमाणात सरकारही जबाबदार आहे. पावसापूर्वी हे काम झाले नाही तर याठिकाणी मोठ्या संख्येने अपघात होतील. त्यामुळे लवकरात लवकर उपाययोजना करणे आवश्यक आहे.