अवित बगळे
पणजी :
अनुदानित विद्यालयांतील शिक्षक व शिक्षकेतर कर्मचाऱ्यांचे या महिन्याचे वेतन शैक्षणिक संस्थांनी द्यावे, असा आदेश देऊन वाद निर्माण करत २४ तासांत तो आदेश मागे घेण्याची नामुष्की ओढवून घेतलेल्या शिक्षण संचालक वंदना राव यांची आज तडकाफडकी बदली करण्यात आली. शिक्षण उपसंचालक संतोष आमोणकर यांच्याकडे शिक्षण संचालकपदाचा ताबा देण्यात आला आहे. गोव्यातील अधिकाऱ्याकडेच शिक्षण संचालकपदाचा ताबा द्यावा, अशी मागणी विरोधी पक्षांनीही केली होती.
राव यांना अतिरिक्त जिल्हाधिकारी (उत्तर -१) या पदावर नियुक्त केले आहे. याशिवाय गुंतवणूक प्रोत्साहन मंडळाच्या मुख्य कार्यकारी अधिकारी पदाचा अतिरिक्त ताबाही त्यांच्याकडे देण्यात आला आहे. अतिरिक्त जिल्हाधिकारी (उत्तर १) दशरथ रेडकर यांना त्या पदावरून हटवून त्यांना सचिवालयातील कार्मिक विभागात हजेरी लावावी, असा आदेश जारी करण्यात आला आहे. शशांक मणी त्रिपाठी यांची बदली अबकारी आयुक्त पदावर झाली असून क्रीडा व युवा व्यवहार खात्याच्या संचालकपदाचा अतिरिक्त ताबाही त्यांच्याकडेच असेल.
|