Goa Culture: लोकोत्सवास देशव्यापी प्रतिसाद

Goa Culture: ‘लोकोत्सव’मधून गोव्याच्या परंपरा आणि संस्कृतीचे रक्षण करण्याच्या हेतूने आदर्श युवा संघ सक्रिय आहे. या लोकोत्सवाला 20 हून अधिक राज्यातील लोक काणकोण येथील लोकोत्सवाला भेट देण्याची अपेक्षा आहे, असा दावा गोवा विधानसभेचे सभापती रमेश तवडकर यांनी केला.

मंगळवारी लोकोत्सव पर्वरीत विधानसभा संकुलात झालेल्या आमंत्रण कार्यक्रमात सभापती रमेश तवडकर यांनी सांगितले की, आदर्श युवा संघ संघटनेची स्थापना 1995 मध्ये झाली असून आजपर्यंत या संघटनेने अनेक लोकोपयोगी कामे केली आहेत.

सभापती म्हणाले, आदर्श युवा संघ समाजात सकारात्मक बदल घडवत आहे. पूर्वी पैशाला फारसे महत्त्व दिले जात नव्हते, पण सध्या यश मिळालेला माणूस आपल्या गावी परतत नाही. तो त्याच्या मुळांकडे दुर्लक्ष करतो. लोकांमधील तो संबंध पुन्हा प्रस्थापित करून ग्रामीण भागातील गरजूंना मदतीसाठी ‘श्रमधाम’ योजना आणली आहे.

आम्ही फक्त एक रुपया आणि एका व्यक्तीचा एक दिवस मागत आहोत. आम्ही काणकोणमध्ये 20 घरे बांधली आहेत. आम्ही हे काम मार्च महिन्यात सुरू केले आणि जूनमध्ये ही घरे पूर्ण केली.

पेडणे ते काणकोणपर्यंत 20 टक्के लोकांनी एकत्र येऊन गरजू लोकांना मदत केली तर लवकरच सर्व राज्यातील गरजूंना स्वतःचे घर मिळेल. जे सरकारी योजना घेऊन घर बांधण्यास असमर्थ आहेत, त्यांच्यासाठी ‘श्रमधाम’ची संकल्पना सर्व गोव्यात पसरली पाहिजे.

भारत हा सर्वात मोठा लोकशाहीप्रधान देश आहे. पंचायतीचे एकत्रिकरण आणि सरपंच व स्थानिक लोकप्रतिनिधींचे बळकटीकरण अत्यंत गरजेचे असून आपण या दिशेने वाटचाल केली,तर गोवा अधिक मजबूत होईल, असेही ते म्हणाले.

काणकोणला सांस्कृतिक केंद्र बनवू !

हा लोकोत्सव कार्यक्रम गोव्याची ग्रामीण सांस्कृतिक परंपरा जपण्यात महत्त्वाची भूमिका बजावतो. गोव्यात पर्यटनाच्या नावाखाली घडणाऱ्या गुन्ह्यांमध्ये ९९ टक्के लोक बाहेरचे आहेत. पर्यटकांनी हेही समजून घेतले पाहिजे,की किनारे आणि कॅसिनो आणि काही लोकप्रिय क्षेत्रांच्या पलिकडे गोवा आहे. गोव्याला समृद्ध परंपरा आणि संस्कृती आहे. काणकोणला सांस्कृतिक केंद्र म्हणून विकसित करता येईल, असे तवडकर यांनी पुढे नमूद केले.