कोल्हापूर: गोवा विद्यापीठात छत्रपती शिवाजी महाराज अध्यासन केंद्र सुरू करावे, अशी मागणी खासदार युवराज संभाजीराजे छत्रपती यांनी गोव्याचे मुख्यमंत्री प्रमोद सावंत यांच्याकडे आज निवेदनाद्वारे केली.

विद्यार्थी, अभ्यासकांना त्याचा लाभ होईल, असे त्यांनी सांगितले. गोव्यात जाऊन त्यांनी मुख्यमंत्री सावंत यांची भेट घेतली. रायगड विकास प्राधिकरणाला, गोवा सरकारने पोर्तुगीज कागदपत्रे, पत्रव्यवहार आणि संदर्भग्रंथ याबाबत सहकार्य करण्याची विनंती करण्यात आली. गोव्याचे पोर्तुगीज आणि मराठा सत्तांमध्ये नेहमी संघर्ष होता. व्यापारी संबंध देखील होते.

त्यामुळे अनेक पत्रव्यवहार झाले होते. त्यातून रायगड संबंधातील काही नोंदी सापडतील का? हा प्रमुख उद्देश आहे. तसे थेट पुरावे सापडले तर, रायगड संवर्धन कार्यात त्याचा उपयोग होईल, असे संभाजीराजे यांनी स्पष्ट केले. पोर्तुगीज, मराठी किंवा इंग्रजी जाणणारे लोक आहेत. 

त्यांच्या माध्यमातून प्राधिकरणाला सर्व ती कागदपत्रे उपलब्ध करून देऊ, असे सांगत मुख्यमंत्री सावंत यांनी  अध्यासन केंद्र स्थापन करण्याबाबत लवकर निर्णय घेऊ, अशी ग्वाही 
दिली.