Manish Jadhav
इंग्लंड दौऱ्याची सुरुवात शतकाने करणाऱ्या यशस्वी जयस्वालने ओव्हल कसोटीच्या (Oval Test) शेवटच्या डावातही शतक झळकावले. त्याच्या या खेळीने भारताला मजबूत स्थितीत आणले.
ओव्हलमध्ये यशस्वीने केलेले हे शतक त्याच्या कसोटी कारकिर्दीतील चौथे शतक आहे. याआधी त्याने इंग्लंडविरुद्धच्या मालिकेतही शतकी खेळी केली होती.
या शतकामुळे यशस्वीने महान फलंदाज सुनील गावस्कर आणि कर्णधार रोहित शर्मा यांच्या इंग्लंडविरुद्धच्या कसोटी शतकांच्या विक्रमाशी बरोबरी साधली.
इंग्लंडविरुद्ध सर्वाधिक कसोटी शतके झळकावण्याच्या यादीत राहुल द्रविड आणि सचिन तेंडुलकर प्रत्येकी 7 शतकांसह अव्वल स्थानी आहेत. यशस्वी आता संयुक्तपणे चौथ्या स्थानी पोहोचला.
23 वर्षांचा असताना यशस्वीने इंग्लंडविरुद्ध 9 वेळा 50 हून अधिक धावा केल्या आहेत. तर सचिन तेंडुलकरने याच वयापर्यंत इंग्लंडविरुद्ध 8 वेळा हा पराक्रम केला होता.
या सामन्याच्या पहिल्या डावात तो केवळ 2 धावांवर बाद झाला होता. पण दुसऱ्या डावात त्याने आपल्या नैसर्गिक आक्रमक शैलीत फलंदाजी करत धावा काढण्याची एकही संधी सोडली नाही.
यशस्वीच्या या महत्त्वपूर्ण शतकी खेळीमुळे भारतीय संघाने सामन्यात चांगली आघाडी घेतली आहे.
त्याची ही कामगिरी भारताच्या विजयासाठी महत्त्वाची ठरु शकते.