Pranali Kodre
दक्षिण आफ्रिका विरुद्ध भारत संघात कसोटी मालिकेतील दुसरा सामना केपटाऊनला पार पडला. या सामन्यात भारताने दुसऱ्याच दिवशी म्हणजे 4 जानेवारी 2024 रोजी 7 विकेट्सने विजय मिळवला.
या विजयासह भारताने मालिकेत 1-1 अशी बरोबरी साधली. दरम्यान, हा सामना दक्षिण आफ्रिकेचा स्टार खेळाडू डीन एल्गारचा अखेरचा सामना ठरला.
केपटाऊनमधील सामन्यानंतर त्याने आंतरराष्ट्रीय क्रिकेटमधून निवृत्ती घेतली.
विशेष म्हणजे अखेरच्या सामन्यात एल्गारने नियमित कर्णधार तेंबा बाऊमाच्या अनुपस्थितीत दक्षिण आफ्रिका संघाचे कर्णधारपदही सांभाळले.
दरम्यान, भारताने सामना जिंकल्यानंतर भारताचा स्टार फलंदाज विराट कोहली आणि कर्णधार रोहित शर्मा यांनी खिलाडूवृत्ती दाखवत भारतीय संघाकडून त्याला स्वाक्षरी केलेली जर्सीही भेट म्हणून दिली.
ही भेट देत असतानाचे फोटोही बीसीसीआयने शेअर केले आहेत.
इतकेच नाही, तर जेव्हा एल्गार केपटाऊन कसोटीतील दुसऱ्या डावात बाद होऊन परत जात होता, तेव्हा भारतीय संघाने त्याचे अभिनंदनही केले.
त्यामुळे सध्या भारतीय संघाचे त्यांच्या खिलाडूवृत्तीबद्दल कौतुक होत आहे.
एल्गारने 12 वर्षे दक्षिण आफ्रिकेकडून आंतरराष्ट्रीय क्रिकेट खेळले. त्याने 86 कसोटी सामन्यात 37.92 च्या सरासरीने आणि 14 शतके व 23 अर्धशतकांसह 5347 धावा केल्या आहेत. त्याने 8 वनडे सामनेही खेळले, ज्यात 104 धावा केल्या आहेत. तसेच त्याने कसोटीत 14 विकेट्सही घेतल्या आहेत.
एल्गारने 18 कसोटी सामन्यात दक्षिण आफ्रिकेचे नेतृत्व करताना 9 सामने जिंकले आणि 8 सामने पराभूत झाले, त्याचबरोबर 1 सामना अनिर्णित राहिला आहे.