गोमन्तक डिजिटल टीम
वायंगण शेतीला प्रारंभ करण्यापूर्वी शेतांच्या, शेतकऱ्यांच्या, सामान्यांच्या संरक्षणासाठी प्रार्थना करण्याचा मुहूर्त म्हणजेच ‘बारस’ उत्सव.
दरवर्षी गणेश चतुर्थी उत्सवात वामन जयंतीदिनी हा उत्सव मोठ्या उत्साहात व परंपरेप्रमाणे साजरा होतो.
बांबूच्या काठ्यांनी बांधून तयार करण्यात येणाऱ्या बारसला पावसाळ्यात जंगलात फुलणाऱ्या विविध पाना फुलांनी सजविले जाते.
बारसला ठेवण्यात येणाऱ्या एका छिद्रातून बारा काश्ये उकडा भात, बारा दवले कुळीताची शिजविलेली पिठी, अळू, पाच पाल्यांची भाजी, वडे असे जिन्नस ठेवतात.
बारसीत नारळाच्या वळ्याचा दिवा लावला जातो.
बारसीत ठेवण्यासाठी पिठापासून जुला बांधलेले दोन बैल (बैलजोडी) व नांगरणीचे जू, एक शेतकरी, एक मगर व कासव बनविले जाते.
सार्वजनिक सांगणे झाल्यानंतर बारस यजमानाच्या डोक्यावर दिली जाते. त्यानंतर हर्रो... हर्रो... च्या गजरात या बारसीची मिरवणूक गावातून निघते.
ही मिरवणूक वाजत गाजत शेतातील पारंपरिक वाटेतून नदीवर जाते. नदीच्या पाण्यात ही बारस विधीवतपणे सोडली जाते. त्यानंतर गावातील ग्रामस्थांना भोजन दिले जाते.