Shreya Dewalkar
सागरी कासवांना अंडी घालण्यासाठी मऊ वाळूची आवश्यकता असते.
मऊ वाळू मिळाली तर ती सहज खड्डा खणून अंडी सुरक्षित ठेवतात. खरे तर मोरजी, आश्वे-मांद्रे हे किनारे कासव संवर्धनासाठी संरक्षित केले आहेत.
मात्र, याच भागात शॅक व्यावसायिक मोठ्या प्रमाणात लाकडी पलंग थाटत आहेत.
त्यामुळे भविष्यात सागरी कासवांना अंडी घालण्यात अडचण येऊ शकते. याकडे वन खात्याच्या अधिकाऱ्यांनी लक्ष देण्याची गरज आहे.
सागरी कासव संवर्धन मोहिमेमुळे मोरजी आणि मांद्रे हे दोन किनारे संवेदनशील म्हणून जाहीर केले आहेत. या दोन्ही किनाऱ्यांवर पूर्णत: शांतता आवश्यक असते.
सायंकाळी सातनंतर विद्युत रोषणाई, ध्वनिप्रदूषण, आतषबाजी अशा प्रकारांवर निर्बंध घातले आहेत. मात्र, सध्या हे निर्बंध कागदोपत्रीच उरले आहेत.
कायद्याची अंमलबजावणी होत नाही. किनाऱ्यांवर पर्यटन खात्याने आखून दिलेल्या जागेत शॅक व्यावसायिकांना सायंकाळी सातनंतर दिवे बंद करणे बंधन आहे.
मात्र, खासगी क्षेत्रातील व्यावसायिकांना हे नियम लागू होत नाहीत.