Sameer Amunekar
कार्निव्हलच्या दिवसात अनेकांची एखादी फेरी दिवाडी बेटावर आपोआपच होते. आकर्षण असते ते तिथल्या पोतेकारांचे. कालपासून हे पोतेकार दिवाडी गावात अवतरले आहेत.
पोर्तुगीज काळापासूनच या गावात साजरा होणारा हा उत्सव कार्निव्हल बरोबरच येतो. या उत्सवाच्या काळात या बेटावरील लोक भीतीदायक पोशाख आणि मुखवटे परिधान करून पोतेकार बनतात आणि लोकांना घाबरवत गावात फिरतात.
विशेष म्हणजे त्यांनी परिधान केलेले मुखवटे त्यांनी स्वतःच बनवलेले असतात. त्यांच्या कमरेवर आणि पायांच्या घोट्यावर घंटा लटकवलेल्या असतात ज्यांचा आवाज दूरवर ऐकू येतो. त्यांच्या हातात असलेली पिशवी (साख) त्यांना अधिकच भयप्रद बनवते.
भीती आणि मनोरंजन या दोन्हींचा अनुभव एकाच वेळी देणारा हा उत्सव आता जागतिक पातळीवर ओळखला जाऊ लागला आहे. ब्लॉगर्स आणि समाजमाध्यमावरील लोकांनी या उत्सवाला सर्व स्तरावर लोकप्रिय बनवले आहे.
दिवाडी बेटावर काल सुरू झालेला हा उत्सव 4 मार्चपर्यंत चालणार आहे. शेवटचा दिवस या उत्सवाची मजा घेण्याचा सर्वोत्तम दिवस असतो असे मानले जाते.
हे पोतेकर जेव्हा गावातील घरांना भेटी देतात तेव्हा घरातील कुटुंबांकडून त्यांना अन्न, पेये आणि मिठाई दिली जाते. या गावातील लोकांनाच पोतेकार बनता येते.पोतेकर जरी गावातील व्यक्ती असली तरी ती नेमकी कोण आहे हे मात्र ओळखणे शक्य होत नाही.