गोमन्तक डिजिटल टीम
ऑलिम्पिक २०२४ चे काल पॅरिसमध्ये दिमाखात उद्घाटन झाले. झळाळून उठलेला आयफेल टॉवर, अद्भुत रोषणाई आणि इतर कार्यक्रमांमुळे क्रीडारसिक आता स्पर्धांकडे डोळे लावून बसलेले आहेत.
सीन नदीमध्ये हजारो खेळाडूंना घेऊन जवळपास ८५ बोटी या सोहळ्याची शोभा वाढवत होत्या. लाखो प्रेक्षक नदीच्या दोन्ही काठांवरून या सोहळ्याचा आनंद घेत होते.
पण तुम्हाला सीन नदीच्या पुनरुज्जीवनाची गोष्ट माहिती आहे का?
तुम्हाला वाचून धक्का बसेल पण गेली अनेक शतके सीन नदी प्रदूषणाच्या विळख्यात सापडली होती. नदीचे पात्र जणू कचरा आणि सांडपाण्याचे आगार बनले होते.
या नदीची प्रदूषण पातळी इतकी वाढली की लोकांना नदीच्या पाण्यापासून लांब ठेवण्याचा निर्णय घ्यावा लागला. १९२३ पासून सीन नदीत पोहण्यास मनाई केली होती.
२०२४ चे ऑलिंपिक पॅरिसमध्ये घोषित झाले आणि त्यानिमित्याने फ्रान्सने सीन नदी स्वच्छतेची मोहीम हाती घेतली. २०१६-१७ पासून या मोहिमेची अंमलबजावणी सुरू झाली.
जवळपास १३००० कोटी सीन नदीसाठी खर्च करण्यात आले. सांडपाणी नियोजन, कचरा व्यवस्थापन, नदी खोरे स्वच्छता या मुददयांवरती सरकारने उपाययोजना आखल्या.
पॅरिसच्या महापौर ॲन हिदल्गो यांनी नदीत पोहून पत्रकारांना आणि आयोजकांना नदीच्या स्वच्छतेबद्दल खात्री करून दिली.
मैदानाऐवजी सीन नदीत ऑलिंपिकचे उद्घाटन करून पर्यावरण संवर्धनाचा संदेश फ्रान्सने दिला आहे. आतापर्यंतचे काम टिकवणे आणि नदी पूर्णत: खुली करणे हा त्यांचा पुढचा टप्पा असणार आहे.
गोंयची परंपरीक नुस्तेमारी