Sameer Amunekar
जर तुम्हाला नवीन सिम कार्ड घ्यायचं असेल, तर त्याआधी तुम्हाला काही गोष्टी माहित असणं आवश्यक आहे. कारण, आता सिम कार्ड घेण्याच्या नियमात बदल करण्यात आला आहे.
पीएमओनं दूरसंचार विभागाला (DOT) महत्त्वाचे निर्देश जारी केले आहेत. यापुढं, सर्व नवीन सिम कार्ड कनेक्शनसाठी आधार कार्डद्वारे बायोमेट्रिक पडताळणी अनिवार्य केली जाईल.
आता सिम कार्ड मिळविण्यासाठी, लोकांना त्यांचे आधार कार्ड दाखवावे लागणार आहे. नागरिकांची ओळख बायोमेट्रिक पद्धतीनं पडताळल्यानंतरच त्यांना सिमकार्ड मिळणार आहे.
खोट्या कागदपत्रांचा वापर करून सिम कार्ड खरेदी करणे, फसवणुकीसह इतर गुन्ह्यांसाठी खोटी कागदपत्रं देण्यावर या निर्णयामुळं बंधन येणार आहे.
यापूर्वी, मतदार ओळखपत्र किंवा पासपोर्टसारख्या कोणत्याही सरकारी कागदपत्राच्या आधारे नागरिकांना नवीन सिम कार्ड खरेदी करता येत होतं.
अनेक लोक बनावट कागदपत्रांचा वापर करून सिम कार्ड खरेदी करत असल्याचं आपल्याला अनेकदा दिसून येत. त्यामूळं फसवणूकीच्या तक्रारी वाढल्या आहेत. त्यामुळं पंतप्रधान कार्यालयानं दूरसंचार विभागाला निर्देश दिले आहेत.