Manish Jadhav
भारत-मालदीव यांच्यातील संबंध अजूनही कमालीचे ताणेलेले आहेत. यातच आता चीन धार्जिण्या मोहम्मद मोइज्जू यांनी संसदीय निवडणुकीत पुन्हा एकदा बाजी मारली.
मालदीवमध्ये नुकत्याच झालेल्या संसदीय निवडणुकीत अध्यक्ष मोहम्मद मोइज्जू यांनी घवघवीत यश मिळवले. मालदीवच्या जनतेने चीन धार्जिण्या मोइज्जू यांच्यावर पुन्हा एकदा विश्वास दाखवला.
संसदीय निवडणुकीत प्रचंड बहुमत मिळवल्यानंतर सोमवारी एका कार्यक्रमात मोइज्जू बोलताना म्हणाले की, ''मालदीवचे लोक विशेषत: सार्वभौमत्व आणि स्वातंत्र्याच्या मुद्द्यावर कुठे उभे आहेत हे आता आंतरराष्ट्रीय समुदायाला समजेल.''
रविवारी झालेल्या निवडणुकीत मोइज्जू यांचा पक्ष पीपल्स नॅशनल काँग्रेस (पीएनसी) ने 93 पैकी 68 जागा जिंकल्या.
संसदीय निवडणुकीतील मोइज्जू यांचा विजय हा भारताच्या परराष्ट्र धोरणाला धक्का मानला जात आहे. हिंद महासागरातील या सामरिकदृष्ट्या महत्त्वाच्या देशातील निवडणुकांच्या निकालावर भारत आणि चीन या दोन्ही देशांचे बारकाईने लक्ष होते.
काही महिन्यांपूर्वी मोइज्जू यांनी भारताशी पंगा घेत मालदीवमध्ये इंडिया आऊट कॅम्पेन चालवले. या कॅम्पेनच्या जोरावरच ते गेल्या वर्षी सत्तेत आले. नोव्हेंबरमध्ये पदभार स्वीकारताच त्यांनी चीनला भेट दिली आणि संरक्षणासह विविध क्षेत्रात बीजिंगसोबत करार केले.
कोणत्याही देशाचे नाव न घेता मोइज्जू म्हणाले की, संसदीय निवडणुकीच्या निकालाने हे सिद्ध केले आहे की मालदीवच्या जनतेला परकीय दबावाशिवाय त्यांच्या भविष्याचा निर्णय घेण्याचे स्वातंत्र्य हवे आहे.