Manish Jadhav
आयपीएल 2025 मध्ये आतापर्यंत केएल राहुलने आपल्या शानदार फलंदाजीने क्रिकेटप्रेमींना मंत्रमुग्ध केले आहे.
मंगळवारी (22 एप्रिल) दिल्ली कॅपिटल्स आणि लखनऊ सुपर जायंट्स यांच्यात झालेल्या सामन्यात राहुलने पुन्हा एकदा अर्धशतक झळकावून संघाच्या विजयात महत्त्वाचे योगदान दिले.
राहुलने आपल्या अर्धशतकाच्या जोरावर एक मोठी कामगिरीही केली. त्याने आयपीएलच्या इतिहासात सर्वात जलद 5000 धावा पूर्ण केल्या. या बाबतीत त्याने विराट कोहली आणि डेव्हिड वॉर्नर यांना मागे सोडले.
आयपीएलच्या इतिहासात सर्वात जलद 5000 धावा पूर्ण करण्याचा रेकॉर्ड आता राहुलच्या नावावर नोंदवला गेला. यापूर्वी, हा रेकॉर्ड डेव्हिड वॉर्नरच्या नावावर होता, ज्याने 135 डावांमध्ये हा पराक्रम केला होता. पण राहुलने फक्त 130 डावांमध्ये 5000 धावा पूर्ण केल्या.
राहुलने या हंगामात आतापर्यंत सातत्यपूर्ण धावा करुन संघाला एक मजबूत सुरुवात दिली आहे.
हंगामापूर्वी अशी चर्चा होती की, त्याला दिल्ली कॅपिटल्सचे कर्णधारपद दिले जाऊ शकते, परंतु राहुलने स्वतः ते नाकारले. त्याने अक्षर पटेलच्या नेतृत्वाखाली खेळण्याचा निर्णय घेतला.
लखनऊ जायंट्स विरुद्ध झालेल्या सामन्यात राहुलने 42 चेंडूत 57 धावांची शानदार खेळी खेळली. त्याने या खेळीदरम्यान 3 चौकार आणि 4 षटकार मारले.
फलंदाजीमध्ये राहुलने तर गोलंदाजीमध्ये मुकेश कुमारने शानदार प्रदर्शन केले. त्यांच्या या प्रदर्शनाच्या जोरावर दिल्लीने लखनऊविरुद्धचा सामना 8 विकेट्सने जिंकला.