Manish Jadhav
तुमचा जोडीदार तुमच्यापेक्षा स्वभावाने किंवा आवडीनिवडीने वेगळा असेल, तर सुरुवातीला काही अडचणी येऊ शकतात. मात्र, अशा 'अपोझिट' स्वभावाच्या व्यक्तींमध्येही नातं खूप घट्ट होऊ शकतं.
तुमचा जोडीदार तुमच्यासारखाच असावा, हा हट्ट सोडा. तो/ती एक वेगळी व्यक्ती आहे आणि त्यांचे विचार वेगळे असू शकतात, हे मनापासून स्वीकारा. बदलाचा प्रयत्न करण्यापेक्षा स्वीकृतीवर भर द्या.
तुमच्या दोघांच्या पद्धती वेगळ्या असतील, तर एकमेकांशी मोकळेपणाने बोला. एखादी गोष्ट आवडली नाही तर ती शांतपणे सांगा. गैरसमज मनात साठवून ठेवण्यापेक्षा संवादाने प्रश्न सोडवा.
जर तुम्हाला शांतता आवडत असेल आणि जोडीदाराला पार्ट्या, तर कधी तुम्ही त्यांच्यासोबत बाहेर जा, तर कधी त्यांनी तुमच्यासोबत शांत वेळ घालवावा. एकमेकांच्या आवडीमध्ये सहभागी होण्याचा प्रयत्न करा.
नातं टिकवण्यासाठी दोन्ही बाजूंनी थोडी तडजोड करावी लागते. नेहमी 'माझंच खरं' करण्यापेक्षा 'दोघांच्या सुखासाठी काय चांगलं आहे' याचा विचार करुन मधला मार्ग काढा.
जोडीदार तुमच्यासारखा नाही याचा अर्थ असा नाही की, त्यांच्यात चांगले गुण नाहीत. त्यांच्यातील सकारात्मक गोष्टींकडे लक्ष द्या. त्यांच्या वेगळेपणामुळे तुमच्या आयुष्यात काय नवीन गोष्टी येतात, याचा आनंद घ्या.
दोघांचे स्वभाव वेगळे असल्यामुळे कधीकधी एकमेकांना 'मी-टाइम' देणं गरजेचं असतं. जोडीदाराला त्यांच्या छंदांसाठी किंवा आवडीच्या कामासाठी वेळ दिल्याने नात्यात गुदमरल्यासारखे वाटत नाही.
दोन सारखी माणसं एकमेकांना कंटाळू शकतात, पण दोन वेगळ्या स्वभावाची माणसं एकमेकांची उणीव भरून काढू शकतात. तुमची कमतरता जोडीदाराच्या गुणांनी भरुन निघू शकते, हे लक्षात घ्या.
स्वभाव कितीही वेगळा असला, तरी कठीण काळात तुम्ही जोडीदाराच्या पाठीशी खंबीरपणे उभे आहात, हा विश्वास नातं टिकवण्यासाठी सर्वात महत्त्वाचा ठरतो.