Manish Jadhav
कोकणातील गुहागर तालुक्यातील हेदवी समुद्रकिनारा हा पर्यटकांसाठी एक शांत आणि निसर्गरम्य ठिकाण आहे. इथली पांढरी वाळू आणि नारळ-पोफळीच्या बागा पर्यटकांचे मन मोहून टाकतात.
हेदवीची खरी ओळख म्हणजे येथील प्राचीन दशाभुज गणेश मंदिर. पेशवेकालीन असलेल्या या मंदिरात श्री गणेशाची 10 हातांची भव्य मूर्ती आहे, जी पाहण्यासाठी भाविक दुरुन येतात.
हेदवी किनाऱ्याजवळील मुख्य आकर्षण म्हणजे 'बामणघळ'. समुद्राच्या लाटा काळ्या पाषाणातील एका मोठ्या भेगेतून (घळ) आदळतात तेव्हा पाण्याचे तुषार 60-70 फूट उंच उडतात, हे दृश्य पाहण्यासारखे असते.
या किनाऱ्यावर कोकणातील इतर किनाऱ्यांप्रमाणे केवळ वाळू नसून, सुंदर काळे पाषाणही पाहायला मिळतात. समुद्राचे पाणी या दगडांवरुन वाहताना खूप आकर्षक दिसते.
जर तुम्हाला शहराच्या गजबजाटापासून दूर एकांत हवा असेल, तर हेदवी हा सर्वोत्तम पर्याय आहे. येथे पर्यटकांची फार गर्दी नसते, त्यामुळे शांतता अनुभवता येते.
हेदवीमध्ये राहण्यासाठी अनेक घरगुती 'होमस्टे' उपलब्ध आहेत. येथे अस्सल कोकणी जेवण, विशेषतः उकडीचे मोदक आणि ताज्या मासळीचा आस्वाद घेता येतो.
हेदवीच्या जवळच वेलणेश्वर हा आणखी एक सुंदर समुद्रकिनारा आणि शिवमंदिर आहे. तसेच गुहागरचा समुद्रकिनारा देखील इथून जवळच आहे.
हेदवीला जाण्यासाठी चिपळूण हे जवळचे रेल्वे स्टेशन आहे. चिपळूण किंवा रत्नागिरीहून एसटी बस किंवा खाजगी वाहनाने सहजरित्या पोहोचता येते.