Pranali Kodre
इंडियन प्रीमियर लीग 2024 स्पर्धेसाठी खेळाडूंचा लिलाव १९ डिसेंबर २०२३ रोजी पार पडणार आहे. त्यापूर्वीच एक मोठी बातमी २७ नोव्हेंबर २०२३ रोजी समोर आली आहे.
गुजरात टायटन्सचा कर्णधार हार्दिक पंड्याच्या ट्रेडिंगबाबत गेल्या अनेक दिवसांपासून सुरु असलेली चर्चा अखेर खरी ठरली आहे. हार्दिक पंड्याची मुंबई इंडियन्समध्ये घरवापसी झाली आहे.
मुंबई इंडियन्सने याबाबत सोशल मीडियावर पोस्ट करत माहिती दिली आहे. गुजरातने हार्दिकला मुंबईबरोबर ट्रेड केले आहे.
हार्दिकने 2015 साली मुंबई इंडियन्सकडूनच आयपीएलमध्ये पदार्पण केले होते. त्यावेळी मुंबईने त्याला 10 लाखांच्या किंमतीत संघात संधी दिली होती.
हार्दिक 2015, 2017, 2019 आणि 2020 साली आयपीएल विजेतेपद मिळवलेल्या मुंबई संघाचाही भाग होता.
हार्दिकने मुंबई इंडियन्सकडून 2015 ते 2021 दरम्यान 92 सामन्यांमध्ये 1476 धावा केल्या. तसेच 51 विकेट्स घेतल्या होत्या.
मात्र, 2022 आयपीएलपूर्वी मुंबईने त्याला संघातून करारमुक्त केले होते. त्यामुळे गुजरात टायटन्सने त्याला 15 कोटींच्या किंमतीत संघात घेत कर्णधारपदही दिले.
त्यामुळे हार्दिक 2022 आणि 2023 हंगामात गुजरातचा कर्णधार होता.
त्याने 2022 मध्ये गुजरात संघाला आयपीएलचे विजेतेपदही जिंकून दिले होते. तसेच आयपीएल 2023 मध्येही त्याच्या नेतृत्वाखाली गुजरात अंतिम सामन्यात पोहचला, पण त्यांना उपविजेतेपदावर समाधान मानावे लागले.
आता पुन्हा एकदा दोन वर्षांनी हार्दिकची मुंबई इंडियन्स संघात घरवापसी झाली आहे.