Manish Jadhav
गोव्यात गेल्या तीन दिवसांपासून पावसाने कहर केला आहे. राज्यात मोठ्याप्रमाणात पडत असलेल्या पावसामुळे अनेक ठिकाणी पडझडीच्या घटना घडल्या.
भंडार वाडा, प्रभाग क्र 1, पेन्हा दी फ्रँका येथील रघुनाथ रातबोले यांच्या मालकीच्या पडक्या घराची भिंत कोसळली. पर्वरी अग्निशमन दल आणि पोलिसांनी पेन्हा दी फ्रँकाच्या तलाठ्यांसह घटनास्थळी पोहोचून पंचनामा केला.
डिचोलीत कार अडकलेल्या महिलेची तब्बल पाच तासांनी सुटका करण्यात आली. अग्निशामन दल, पोलिस आणि स्थानिकांच्या प्रयत्नांमुळ मध्यरात्री दीड वाजता महिलेची सुटका केली.
मुसळधार पावसामुळे डिचोली येथील श्री शांतादुर्गा शिशुवाटिकेला लागून असलेली भिंत कोसळली. शाळेला सुट्टी दिल्याने अनर्थ टळला.
वादळी वाऱ्याच्या तडाख्याने शिगाव काऱ्यामळ येथील सुकुर फर्नांडिस यांच्या घरावर अंब्याचे झाड कोसळले, ज्यामुळे मोठ्याप्रमाणात नुकसान झाले.
कोकण रेल्वे मार्गावर रत्नागिरीजवळ दरड कोसळली. ट्रॅकवरील माती आणि चिखल दूर करण्यासाठी अडचण निर्माण झाली. पाच रेल्वे रद्द करण्यात आल्या.
मोटोज येथे टाटा सुमो आणि अग्निशामन दलाच्या गाडीचा भीषण अपघात झाला. या अपघातात फादर थॉमस ( कुळे, पिलार) जखमी झाले. शिगाव येथे घरावर कोसळलेले झाड काढण्यासाठी अग्निशामन दल जात असताना ही घटना घडली.