Akshata Chhatre
गोवा पर्यटनातील जर का महत्वाचा भाग कुठला असले तर तो म्हणजे इथली संस्कृती. गोव्यात अनेक मंदिरं पाहायला मिळतात आणि या प्रत्येक मंदिराची एक वेगळी गोष्ट आहे.
आता या आख्यायिका आहेत की त्यांना ऐतिहासिक बळ आहे हे ठोसपणे सांगता येत नाही, मात्र स्थानिक आजही या कथा पुढील पिढीपर्यंत पोचोचवतात.
अशाच खास मंदिरांपैकी एक म्हणजे बेतकी येथील मंडोदरीचं मंदिर. लक्ष्यात घ्या हे मंदोदरी नाही तर देवी मंडोदरीचं देऊळ आहे. आता कोण आहे ही देवी?
बेतकी या गावात अनेक वर्षांपूर्वी नदीला बांद बसत नसल्याची एक आख्यायिका आहे. तेव्हा यावर उपाय म्हणून एका तांत्रिकाने गावकऱ्यांना दोन लहान मुलांचा बळी द्यायला सांगितलं होतं.
गावाच्या सीमेवर एक गरीब कुटुंब राहायचं, जिथे वडील नसल्याने एकटी आईच दोन मुलांची काळजी घेत असे, एक दिवशी आई घरी नसतानाच गावकऱ्यांनी केळ्यांचं आमिष दाखवून दोन मुलांचा बळी दिला होता.
यानंतर संतापलेल्या आईने गावाला २४ वर्षांसाठी इथे कुठलंही पीक न उगण्याचा शाप दिला. दुष्काळामुळे लोकांना गाव सोडून जाणं भाग झालं. मात्र काही वर्षानंतर फडते नावाच्या ग्रामस्थांनी या दुखावलेला आईची माफी मागितली.
तेव्हा तिने गावकऱ्यांना मंडोदरी आणि तिच्या भावाचं मंदिर बांधायला सांगितलं आणि वर्षातून एकदा संपूर्ण दिवस गावात भात शिजणार नाही अशी अट घातली, आजही गावकरी या वचनाचं पालन करतात आणि मंडोदरी गावाची आराध्य देवी आहे.