Manish Jadhav
गणपतीपुळेचे मुख्य आकर्षण म्हणजे समुद्राच्या अगदी काठावर असलेले 400 वर्षे जुने 'स्वयंभू' गणेश मंदिर. या मूर्तीचे मुख पश्चिमेकडे असून तिला 'पश्चिम द्वारदेवता' मानले जाते.
येथील समुद्रकिनारा अतिशय स्वच्छ असून तिथली पांढरी आणि सोनेरी वाळू पर्यटकांना भुरळ घालते. निळेशार पाणी आणि किनाऱ्यावरील सुरुची झाडे मन प्रसन्न करतात.
गणपतीपुळे येथे केवळ मंदिरालाच नाही, तर संपूर्ण डोंगर (गिरी) प्रदक्षिणा घालण्याची परंपरा आहे. ही प्रदक्षिणा साधारण 1 किलोमीटरची असून ती करताना निसर्गाचे सुंदर दर्शन घडते.
कोकणी संस्कृती आणि इतिहास जवळून अनुभवायचा असेल, तर येथील 'प्राचीन कोकण' या खुल्या संग्रहालयाला नक्की भेट द्या. येथे जुन्या काळातील कोकणी जीवनशैलीचे दर्शन घडते.
गणपतीपुळेपासून अवघ्या 3 किमी अंतरावर आधुनिक मराठी कवितेचे जनक कवी केशवसुत यांचे 'मालगुंड' हे गाव आहे. तिथे त्यांचे स्मारक आणि सुंदर ग्रंथालय पाहण्यासारखे आहे.
साहसी खेळांची आवड असणाऱ्यांसाठी येथे बोटिंग, पॅरासेलिंग आणि बनाना राईड यांसारखे विविध वॉटर स्पोर्ट्स उपलब्ध आहेत.
येथे आल्यावर अस्सल कोकणी पदार्थांचा आस्वाद घ्यायला विसरु नका. विशेषतः उकडीचे मोदक, सोलकढी, आंबापोळी आणि घावणे पर्यटकांमध्ये खूप लोकप्रिय आहेत.
गणपतीपुळे बीचवरचा सूर्यास्त अत्यंत नयनरम्य असतो. अथांग समुद्रात विरघळणारा सूर्य पाहणे हा एक अविस्मरणीय अनुभव असतो.