Pranali Kodre
ऑस्ट्रेलियन ओपन ही प्रत्येक वर्षी जानेवारीमध्ये खेळली जाणारी प्रतिष्ठीत ग्रँडस्लॅम टेनिस स्पर्धा आहे. 2024 मध्ये ही स्पर्धा 14 जानेवारी ते 28 जानेवारी दरम्यान खेळवली जाणार आहे.
या स्पर्धेसाठी बक्षीस रक्कम जाहीर करण्यात आली आहे. दरम्यान 2023 पेक्षा 2024 सालच्या बक्षीस रकमेत तब्बल 13 टक्के वाढ करण्यात आली.
म्हणजेच यंदा एकूण 86.5 मिलियन ऑस्ट्रेलियन डॉलरच्या बक्षीस रकमेची तरतुद करण्यात आली आहे. 2023 च्या तुलनेत 10 मिलियन ऑस्ट्रेलियन डॉलरची वाढ झाली आहे.
या स्पर्धेत एकेरीत विजय मिळवणाऱ्या पुरुष आणि महिला खेळाडूला 3.150 मिलियन ऑस्ट्रेलियन डॉलर बक्षीस देण्यात येणार आहे, तर महिला आणि पुरुष दुहेरीतील विजयी जोडीला 730,000 ऑस्ट्रेलियन डॉलरचे बक्षीस मिळणार आहे. तसेच मिश्र दुहेरीतील विजेत्यांना 165,000 ऑस्ट्रेलियन डॉलर दिले जाणार आहेत.
एकेरीतील उपविजेत्या खेळाडूंना 1,725 मिलियन ऑस्ट्रेलियन डॉलर, तर महिला आणि पुरुष दुहेरीतील उपविजेत्यांना 400,000 ऑस्ट्रेलियन डॉलरचे बक्षीस मिळणार आहे. त्याचबरोबर मिश्र दुहेरीसाठीही उपविजेत्यांना 94,000 ऑस्ट्रेलियन डॉलरचे बक्षीस दिले जाणार आहे.
इतकेच नाही, तर या स्पर्धेत एकेरीत पहिल्याच फेरीतून बाहेर होणाऱ्या खेळाडूला 120,000 ऑस्ट्रेलियन डॉलर, दुसऱ्या फेरीतून बाहेर होणाऱ्या खेळाडूला 180,000 ऑस्ट्रेलियन डॉलर, तिसऱ्या फेरीतून बाहेर होणाऱ्या खेळाडूला 255,000 ऑस्ट्रेलियन डॉलर, चौथ्या फेरीतून बाहेर होणाऱ्या खेळाडूला 375,000 ऑस्ट्रेलियन डॉलर, उपांत्यपूर्व फेरीसाठी 600,000 ऑस्ट्रेलियन डॉलर, तसेच उपांत्य फेरीसाठी 990,000 ऑस्ट्रेलियन डॉलरचे बक्षीस दिले जाईल.
महिला आणि पुरुष दुहेरीत पहिल्या फेरीसाठी 36,000 ऑस्ट्रेलियन डॉलर, दुसऱ्या फेरीसाठी 53,000 ऑस्ट्रेलियन डॉलर, तिसऱ्या फेरीसाठी 75,000 ऑस्ट्रेलियन डॉलर, उपांत्यपूर्व फेरीसाठी 128,000 ऑस्ट्रेलियन डॉलर, उपांत्य फेरीसाठी 227,500 ऑस्ट्रेलियन डॉलर बक्षीस असेल.
मिश्र दुहेरीसाठी पहिल्या फेरीसाठी 6,900 ऑस्ट्रेलियन डॉलर, दुसऱ्या फेरीसाठी 13,275 ऑस्ट्रेलियन डॉलर, उपांत्यपूर्व फेरीसाठी 26,500 ऑस्ट्रेलियन डॉलर आणि उपांत्य फेरीसाठी 50,000 ऑस्ट्रेलियन डॉलर बक्षीस दिले जाणार आहे.
एवढेच नाही, पात्रता फेरी खेळणाऱ्या खेळाडूनाही बक्षीस दिले जाणार आहे. पहिल्या फेरीतून बाहेर जाणाऱ्याला 31,250 ऑस्ट्रेलियन डॉलर, दुसऱ्या फेरीसाठी 44,100 ऑस्ट्रेलियन डॉलर आणि तिसऱ्या फेरीसाठी 65,000 ऑस्ट्रेलियन डॉलर.