Vinoo Mankad Trophy: कर्णधार पुंडलिक गोव्याच्या विजयाचा शिल्पकार

U-19 Vinoo Mankad Trophy: कर्णधार पुंडलिक नाईक याने आठव्या क्रमांकावर फलंदाजी करताना नोंदविलेल्या आक्रमक नाबाद ४६ धावांमुळे गोव्याने विनू मांकड करंडक १९ वर्षांखालील एकदिवसीय सामन्यांच्या क्रिकेट स्पर्धेत शानदार विजय नोंदविला. कमी धावसंख्येच्या सामन्यात सौराष्ट्रवर तीन विकेट राखून नमविले.

स्पर्धेच्या ड गटातील सामना शनिवारी पुदुचेरी येथे झाला. पावसामुळे सामना प्रत्येकी ३६ षटकांचा करण्यात आला. गोव्याचा मध्यमगती स्वप्नील गावकर (४-३३) व ऑफस्पिनर यश कसवणकर (३-१४) यांनी सौराष्ट्राचा डाव १२२ धावांत गुंडाळला.

नंतर १ बाद ४६ वरुन गोव्याचीही घसरगुंडी उडाली. १० धावांत ५ विकेट गमावल्यामुळे डाव ६ बाद ५६ असा गडगडला. पुंडलिकने दिशांक मिस्कीन (२२) याच्यासमवेत सातव्या विकेटसाठी ५१ धावांची भागीदारी करून गोव्याला सावरले.

नंतर संघाला शेवटचे तीन चेंडू राखून विजय मिळवून दिला. पुंडलिक ४६ धावांवर नाबाद राहिला. त्याने ३९ चेंडूंत दोन चौकार व तीन षटकारांच्या मदतीने नाबाद ४६ धावा केल्या.

गोव्याचा हा स्पर्धेतील सलग दुसरा विजय ठरला. अगोदरच्या लढतीत त्यांनी अरुणाचल प्रदेशला १२४ धावांनी हरविले होते. पुढील सामना सोमवारी (ता. १६) राजस्थानविरुद्ध खेळला जाईल.

संक्षिप्त धावफलक

सौराष्ट्र : ३२.२ षटकांत सर्वबाद १२२ (जैनाम २३, अंश गोसाई २०, तिर्थकजसिंह जडेजा नाबाद २३, पुंडलिक नाईक ५.२-०२४-१, युवराज सिंग ५-०-२५-१, स्वप्नील गावकर ८-०-३३-४, शिवांक देसाई ७-०-२५-१, यश कसवणकर ७-१-१४-३) पराभूत

वि. गोवा: ३५.३ षटकांत ७ बाद १२७ (वीर यादव ८, शंतनू नेवगी २६, मल्हार नाईक ११, यश कसवणकर २, दिशांक मिस्कीन २२, जीवनकुमार चित्तेम ५, वर्धन मिस्कीन ०, पुंडलिक नाईक नाबाद ४६, युवराज सिंग नाबाद ५, मार्विन जाविया २-२५, अंश गोसाई २-१४).