Akshata Chhatre
हिंदू धर्मातील प्रत्येक पूजाविधीमध्ये फुलांना विशेष स्थान दिले गेले आहे.
जेव्हा भक्त आपल्या हृदयातील श्रद्धा आणि प्रेमाने देवाला फुल अर्पण करतो, तेव्हा त्या कृतीला अधिक आध्यात्मिक महत्त्व प्राप्त होते.
याच भावनेतून "मंत्र पुष्पांजली" उच्चारली जाते. ‘मंत्र’, ‘पुष्प’ आणि ‘अंजली’ या तीन शब्दांचा संगम म्हणजे मंत्र पुष्पांजली
जिथे भक्त विशेष मंत्रांचा जप करून देवाला फुल अर्पण करतो. पूजेच्या शेवटी हा मंत्र म्हटला जातो, ज्यामुळे संपूर्ण विधीला पूर्णता मिळते.
भक्त आपल्या हातात फुल घेऊन उभा राहतो, देवाचे ध्यान करतो आणि मंत्रोच्चार पूर्ण झाल्यावर ते फुल देवाच्या चरणी ठेवतो.
असे मानले जाते की या कृतीमुळे देव प्रसन्न होतात, भक्ताचे मन शुद्ध होते आणि जीवनात सुख-समाधानाची अनुभूती मिळते.
मंत्र पुष्पांजली हे केवळ देवाला अर्पण केलेले फुल नसून भक्ताचा नम्र अभिवादन, कृतज्ञता आणि प्रार्थना यांचे प्रतीक आहे.