Pranali Kodre
भारतीय संघाने आशिया चषक 2023 स्पर्धेच्या सुपर कपच्या सामन्यात पाकिस्तानविरुद्ध 11 सप्टेंबर रोजी 228 धावांनी विजय मिळवला.
या सामन्यात विराटने 94 चेंडूत 9 चौकार आणि 3 षटकारांसह 122 धावांची नाबाद खेळी केली.
या शतकी खेळी दरम्यान विराट कोहलीने 13 हजार वनडे धावाही पूर्ण केल्या आहेत. तो 13 हजार धावा करणारा जगातील 5 वा खेळाडू ठरला आहे.
विराटपूर्वी सचिन तेंडुलकर (18426), कुमार संगकारा (14234), रिकी पाँटिंग (13704) आणि सनथ जयसूर्या (13430) यांनी वनडेत 13 हजार धावांचा टप्पा पार केला आहे.
मात्र, विराटने इतर चौघांपेक्षाही सर्वात जलद 13 हजार वनडे धावा करण्याचा पराक्रम केला आहे. विराटने 267 व्या वनडे डावात खेळताना हा टप्पा ओलांडला.
यापूर्वी सचिन तेंडुलकरच्या नावावर सर्वात जलद 13 हजार वनडे धावा करण्याचा विक्रम होता. सचिनने 321 डावात 13 हजार वनडे धावा पूर्ण केल्या होत्या.
तसेच विराट, सचिनच्या पाठोपाठ सर्वात जलद 13 हजार वनडे धावा करणाऱ्या फलंदाजांच्या यादीत रिकी पाँटिंग (341 डाव), कुमार संगकारा (363 डाव) आणि सनथ जयसूर्या (416 डाव) हे फलंदाज आहेत.
महत्त्वाचे म्हणजे विराट वनडेमध्ये सर्वात जलद 8 हजार, 9 हजार, 10 हजार, 11 हजार, 12 हजार आणि 13 हजार धावांचा टप्पा पार करणारा खेळाडू आहे.