Pranali Kodre
भारताची स्टार टेनिसपटू सानिया मिर्झा आणि पाकिस्तानचा क्रिकेटपटू शोएब मलिक हे सेलिब्रेटी जोडपं अनेकदा चर्चेत येत असते.
गेल्या काही काळात त्यांच्या नात्याबद्दलच चर्चा अधिक झाल्या आहेत. गेल्या काही महिन्यांपासून ते वेगळे होणार असल्याच्या चर्चांनी जोर धरला होता.
मात्र, नुकतेच शोएब आणि सानिया पुन्हा एकत्र दिसले आहेत.
शोएब आणि सानिया यांचा मुलगा इझहानच्या वाढदिवसाचे सेलिब्रेशन त्यांनी एकत्र केले आहे, त्याचे फोटोही शोएबने सोशल मीडियावर शेअर केले आहेत.
दरम्यान, शोएबने 29 ऑक्टोबर रोजी शेअर केलेल्या फोटोंमध्ये तो इझहानबरोबर दिसत आहे, तसेच त्या फोटोत त्या दोघांच्याही मागे सानिया उभी असल्याचेही दिसत आहे.
या फोटोंच्या पोस्टला सानियाने लाईकही दिले आहे.
त्यामुळे आता पुन्हा या दोघांमधील दुरावा मिटला आहे का? ते पुन्हा एकत्र आले आहेत का? अशा अनेक चर्चांना उधाण आले आहे.
लक्षात घेण्यासारखी गोष्ट अशी की अद्याप शोएब किंवा सानिया यांनी या चर्चांबाबत कोणतेही अधिकृत भाष्य केलेले नाही.
शोएब आणि सानिया यांनी 2010 मध्ये लग्न केले होते. त्यानंतर त्या दोघांना ऑक्टोबर 2018 मध्ये मुलगा झाला, ज्याचे नाव त्यांनी इझहान मिर्झा मलिक ठेवले.