Manish Jadhav
सवणे बीच हा आंजर्ले आणि केळशी या दोन प्रसिद्ध किनाऱ्यांच्या मध्ये वसलेला एक अतिशय शांत आणि प्रदूषणमुक्त किनारा आहे. पर्यटकांच्या गर्दीपासून दूर असल्याने हा बीच आजही निसर्गदत्त स्वरुपात टिकून आहे.
या किनाऱ्याची विशेष ओळख म्हणजे इथली पांढरी शुभ्र वाळू आणि निळेभोर पाणी. किनाऱ्याच्या एका बाजूला पसरलेली हिरवीगार डोंगररांग आणि सुरुची झाडे यामुळे इथले सौंदर्य अधिकच खुलून दिसते.
इतर प्रसिद्ध बीचेसच्या तुलनेत सवणे बीच अत्यंत स्वच्छ आहे. पाण्याचा प्रवाह संथ असल्याने आणि किनारा उथळ असल्याने इथे समुद्रात डुंबण्याचा आनंद सुरक्षितपणे घेता येतो.
आंजर्लेप्रमाणेच सवणे बीचवरही 'ऑलिव्ह रिडले' जातीच्या कासवांचे संवर्धन केले जाते. नशीब जोरावर असेल तर तुम्हाला फेब्रुवारी ते एप्रिल दरम्यान कासवांची पिल्ले समुद्राच्या दिशेने जाताना पाहता येऊ शकतात.
जर तुम्हाला शांत वातावरणात फोटो काढायला आवडत असेल, तर सवणे बीच तुमच्यासाठी बेस्ट आहे. इथला सूर्यास्त (Sunset) पाहणे हा एक अविस्मरणीय अनुभव असतो.
सवणे बीचजवळच उंच डोंगर असल्याने ट्रेकिंगची आवड असणारे लोक इथल्या टेकडीवर जाऊन संपूर्ण अरबी समुद्राचे विहंगम दृश्य पाहू शकतात. तसेच, इथे कॅम्पिंगचा आनंदही घेता येतो.
सवणे गावात राहण्यासाठी अनेक घरगुती 'होमस्टे' उपलब्ध आहेत. तिथे तुम्ही अस्सल कोकणी पद्धतीचे मासे, उकडीचे मोदक आणि सोलकढीचा आस्वाद घेऊ शकता.
दापोली शहरापासून सवणे बीच सुमारे 25-30 किमी अंतरावर आहे. आंजर्लेहून केळशीकडे जाणाऱ्या सागरी मार्गावरुन तुम्ही स्वतःच्या वाहनाने किंवा एसटी बसने इथे सहज पोहोचू शकता.