Pranali Kodre
वनडे वर्ल्डकप 2023 स्पर्धेत भारतीय संघाने 11 ऑक्टोबर सलग दुसऱ्या विजयाची नोंद केली. दिल्लीतील अरुण जेटली स्टेडियमवर झालेल्या सामन्यात भारताने अफगाणिस्तानविरुद्ध 8 विकेट्सने विजय मिळवला.
भारताच्या या विजयात रोहित शर्माने शतक करत महत्त्वाचा वाटा उचलला. त्याने 84 चेंडूत 16 चौकार आणि 5 षटकारांसह 131 धावांची खेळी केली. त्याला या सामन्याचा सामनावीर पुरस्कारही मिळाला.
या खेळीदरम्यान रोहितने वनडे वर्ल्डकपमध्ये 1000 धावाही पूर्ण केल्या. तो वनडे वर्ल्डकपमध्ये 1000 धावा पूर्ण करणारा जगातील 23 वा खेळाडू ठरला आहे.
23 वा खेळाडू असला तरी त्याने वनडे वर्ल्डकपमध्ये सर्वात जलद 1000 धावा करणारा क्रिकेटपटू बनण्याच्या डेव्हिड वॉर्नरच्या विश्वविक्रमाशी बरोबरी केली आहे.
रोहितने 19 व्या डावात या 1000 धावा पूर्ण केल्या आहेत.
वॉर्नरनेही 19 डावातच वनडे वर्ल्डकपमध्ये 1000 धावा पूर्ण केल्या होत्या.
वनडे वर्ल्डकपमध्ये सर्वात जलद 1000 धावा करणाऱ्या क्रिकेटपटूंच्या यादीत रोहित आणि वॉर्नर यांच्या पाठोपाठ दुसऱ्या क्रमांकावर संयुक्तरित्या सचिन तेंडुलकर आणि एबी डिविलियर्स आहेत.
सचिन आणि डिविलियर्सने वर्ल्डकपमध्ये प्रत्येकी 20 डावात 1000 धावा पूर्ण केल्या होत्या.
तिसऱ्या क्रमांकावर संयुक्तरित्या विव रिचर्ड्स आणि सौरव गांगुली आहेत. रिचर्ड्स आणि गांगुली यांनी वर्ल्डकपमध्ये प्रत्येकी 21 डावात 1000 धावा केल्या आहेत.