Shreya Dewalkar
गोव्यात टोमॅटोचा दर 80 रुपये किलो, पुढील महिन्‍यापर्यंत स्‍थिती येणार पूर्वपदावर; डिचोलीत आवक वाढली
गेल्या चार-पाच महिन्यांपासून स्वयंपाक घरातून गायब झालेल्‍या आणि आहारातील एक प्रमुख घटक असलेल्या टोमॅटोचे दर आता सामान्य ग्राहकांच्या आवाक्यात येण्याचे संकेत मिळाले आहेत.
शुक्रवारी 160 रुपयांपर्यंत असलेला टोमॅटोचा दर शनिवारी एकदम अर्ध्या पटीने म्‍हणजे 80 रुपयांवर आला.
डिचोलीत प्रतिकिलो 80 रुपयांनी शनिवारी टोमॅटोची विक्री करण्‍यात येत होती. आवक वाढल्याने टोमॅटोचा दर उतरला असून,
श्रावण महिन्यात तो पूर्वपदावर येण्याची शक्यता आहे. तसे संकेत विक्रेत्यांकडून मिळाले आहेत.
गेल्या चार-पाच महिन्यांपासून टोमॅटोचे दर दिवसेंदिवस वाढत चालले होते. शुक्रवारपर्यंत प्रतिकिलो 160 रुपयांपर्यंत दर गेला होता.
त्यामुळे सामान्य लोकांच्‍या स्‍वयंपाकघरातून टोमॅटो गायब झाला होता. दर ऐकताच नको तो टोमॅटो म्हणण्याची वेळ ग्राहकांवर आली होती.
स्वयंपाकघर सोडाच, हॉटेलमध्‍येही टोमॅटोचे दर्शन दुर्लभ झाले होते. मात्र आता टोमॅटो स्वस्त होण्याचे संकेत मिळाल्याने सामान्य ग्राहकांसाठी ही दिलासादायक बाब ठरली आहे.
कर्नाटकातून गोव्यात येणाऱ्या अन्य भाज्याही स्वस्त होण्याची चिन्‍हे दिसू लागली आहेत.
डिचोलीच्या बाजारपेठेत कर्नाटक राज्यातून टोमॅटो येत असतो. मात्र हवामानातील बदलाचा परिणाम टोमॅटोच्‍या पिकावर झाला.
त्यातच कर्नाटकातून दिल्ली, मध्यप्रदेश आदी राज्यांत टोमॅटोची निर्यात होत होती. त्यामुळे गोव्यात टोमॅटोची टंचाई निर्माण झाली होती.
या राज्यांतील निर्यात आता बंद झाल्याने गोव्यात टोमॅटोची आवक वाढणार आहे. हळूहळू टोमॅटोचे दर पूर्वपदावर येतील.