Pranali Kodre
आयपीएल 2023 स्पर्धेचा अंतिम सामना 28 मे रोजी चेन्नई सुपर किंग्स विरुद्ध गुजरात टायटन्स संघात अहमदाबादच्या नरेंद्र मोदी स्टेडियमवर खेळवला जाणार होता.
पण रविवारी अहमदाबादमध्ये संध्याकाळी सातत्याने पाऊस पडत होता. रात्री साधारण 11 वाजले तरी पावसाच्या सरी बरसत होत्या. त्यामुळे मैदानही ओले झाले होते.
अखेर पावसाचा अडथळा आल्याने हा अंतिम सामना राखीव दिवशी म्हणजे 29 मे रोजी खेळवण्याचा निर्णय सामनाधिकाऱ्यांनी घेतला आहे.
त्यामुळे आयपीएलच्या इतिहासात पहिल्यांदाच असे झाले आहे की अंतिम सामना राखीव दिवशी खेळवला जाणार आहे.
आता राखीव दिवशी देखील संध्याकाळी 7.30 वाजता या अंतिम सामन्याला सुरुवात होईल. तसेच त्याआधी नाणेफेक होईल.
तसेच सामना पाहायला आलेल्या प्रेक्षकांना त्यांची तिकिट्स नीट ठेवण्याची विनंती करण्यात आली असून या तिकिट्सनुसारच राखीव दिवशीही प्रेक्षकांना स्टेडियममध्ये प्रवेश करता येणार आहे.
दरम्यान, जर राखीव दिवशीही पावसामुळे सामना पूर्ण झाला नाही, तर गुणतालिकेत गुजरात टायटन्स चेन्नई सुपर किंग्सच्या पुढे अव्वल स्थानावर असल्याने त्यांना विजेते घोषित केले जाईल.
अंतिम सामन्यात जर चेन्नई सुपर किंग्सने विजय मिळवला तर हे त्यांचे आयपीएलमधील पाचवे विजेतेपद असेल. तसेच गुजरात टायटन्सने विजय मिळवला, तर त्यांचे हे सलग दुसरे आयपीएल विजेतेपद असेल.