Rama Kankonkar Assault Case Court Hearing

पणजी: रामा काणकोणकर यांच्यावरील जीवघेणा हल्ला प्रकरणातील मुख्य संशयित जेनिटो कार्दोजच्या जामिनावरील सुनावणी गुरुवारी पार पडली. काणकोणकरांनी न्यायालयात लेखी उत्तर सादर करून जेनिटोला जामीन नाकारावा, अशी ठाम भूमिका घेतली आहे. त्यावर उद्या (शुक्रवारी) न्यायालयात युक्तिवाद होणार आहे.

काणकोणकर यांनी दिलेल्या या निवेदनात संशयित कार्दोजच्या कथित गुन्हेगारी पार्श्वभूमीचा तपशील देत, न्यायालयाने जामीन देताना याचा विचार करावा, या गुन्ह्याने सर्वसामान्य जनतेच्या मनात दहशत निर्माण झाली आहे. त्यामुळे जेनिटोला जामीन देणे अत्यंत धोकादायक ठरेल.

पूर्वनियोजित कट आणि डिजिटल पुरावे

पोलिस तपासानुसार, काणकोणकर यांनी समाजमाध्यमांवर केलेल्या पोस्टमुळे जेनिटो नाराज होता आणि त्यातूनच हा कट रचला गेला. १८ सप्टेंबर रोजी हल्ला केला, तेव्हा जेनिटोला व्हॉट्स अ‍ॅप कॉलद्वारे रामाचे लोकेशन दिले होते.

महत्त्वाच्या डिजिटल पुराव्यांत पोलिसांनी नमूद केले की, जेनिटोने स्वतःच्या मोबाईलवरील सर्व कॉल रेकॉर्ड अटकेपूर्वीच जाणूनबुजून डिलीट केले. त्यावरून त्याचा या प्रकरणातील थेट सहभाग सिद्ध होतो, असा पोलिसांचा दावा आहे.